خضرا الشريفه

واحد صاحبى عزيز على بيحب واحده اسمها فتكات وليها شنبات

وهى عامله فيها ستنا خضرا الشريفه

فانا حبيت اوضحله حقيقة خضرا الشريفه
.
..
...
.....

تعالى جنبى تقولك لأ .......نتمشى شوية تقولك لأ

دايره تصيع مع كل الناس وتيجى عليك وتقولك لأ

ادينى النمره تقولك لأ.......ادينى الميل تقولك لا

طول الليل فى النت كافيه وتيجى عليك وتقولك لأ

تيجى تبوسها تقولك لأ...... تمسك ايديها تقولك لأ

كل الناس بتعط معاها وتيجى معاك وتقولك لأ

تديها فلوس تقولك لأ .... طب سلفهاتقولك لأ

امها شحاته وابوها شمام وتيجى معاك وتقولك لأ

تاكلى سجق تقولك لأ ... طب برجر ساده تقولك لأ

بتاكل بيض بالبسطرمة وتيجى معاك وتقولك لأ

نشرب شاى تقولك لأ.... نسكافيه برضه لأ

بتروح اصلا تشرب سوبيا وتيجى عليك وتقولك لأ

تديها سيجاره تقولك لأ ....نشرب شيشه تقولك لأ

بتحب البانجو وتشرب بيره وتيجى معاك وتقول ك لا

استنى شويه تقولك لأ .... هنروح حالا تقولك لأ

بتروح اصلا وش الفجر وتيجى معاك وتقولك لأ

نركب تاكسى تقولك لا ....طب نتمشى تقولك لأ
بتيجى الجامعه راكبة حمار وتيجى معاك وتقولك لأ

نسافر شرم تقولك لأ .... طب مطروح تقولك لأ

ساكنه فى حته اسمها زنانيرى وتيجى معاك وتقولك لأ
.....
...
..
.

طبعا كده المفروض الواحد يعرف حقيقة اى واحده تعمل نفسها خضرا الشريفه

BAD PHARMA BOY

احنا مش ف اتوبيس يا كلاب

فى احد الايام الغبراء...السنه اللى فاتت ...كنت (اللى هو انا ..برايز)...داخل الخرابه.....(اللى هو المجمع )من بوابة كبيرة من ناحية شارع البحر...(الشارع ده ف طنطا

ولكن كان شىء غريب ان البوابة دى كانت زحمه ...كان حوالى اكتر من 30 نفر (30 نفر على بوابه ف كلية فى طنطا تعتبرزحمه )كان تقريبا كلهم اولاد ومكنش فيهم الا بنت منقبه واحده وشايله بالطو ابيض

المهم وقفت ف وسط هذه الكتله من اللحم البشرى العرقان ...يارب يا ساتر ....الامن طبعا بيأدى دوره ...العسكرى واقف زى الاسد

بيقول ...كارنيهك يا استاذ ...كارنيهك يا محترم ...انتى يا ابله ...رايحه فين ؟؟؟

المهم ف وسط الزحمه دى لقيت عيل كده جاى يتساير معايا على ما الزحمه دى تخلص....المهم اتكلمنا شويه ...الدنيا كانت حر والواد كان لزج بطريقه غبيه والدنيا كانت زحمه على البوابه ...مش عارف كان فى ايه عند البوابه ...اظاهر حد مهم جاى او فى مشاكل عند بتوع الامن ...المهم مكنش فى حد بيعدي من البوابه ....وكل ده وانا واقف مع الواد اللزج ده ....يارب العسكرى يفتح البوابه... طبعا الوقت مكنش طويل اوى كده لكن انا اكمني كنت مستعجل حسيت بكده .....المهم مفيش دقيقتين الواد اللزج كان بيحكيلي حكايه عن اكبر بيضه شافها ف

حياته ...واذا بيه ف وسط الكلام ...فتح بقه ...طلع من بقه لعاب ...اللعاب على الارض ....قولتله : فى ايه يا لزج ؟؟؟؟؟

انتا يا لزج ؟؟؟

لزج ؟؟؟ لـــــــــزــــــــــــــــــــــــج

قالى :ه ش ك ه ...؟؟؟؟؟

انا :بجد يا لزج ؟؟؟

اه والله هشكه...

وتقريبا التلاتين نفر قالوها ف بق واحد :هشكــــــــــــــــــــــــــــــه

انا قولت ف عقل بالي ....مستحيل ...هشكه ....فين ؟؟؟؟ ف المجمع الطبي ؟؟؟؟؟؟

بصيت ورايا لقيت حوالى تلاتين نفر تانيين غير اللى ع البوابه ....وقدامهم واحده هشكه ..داخله زى الاسد ولا حد قالها انتى رايحه فين ولا كارنيهك ولا ولا

هى ك استايل اول مرة اشوفه فى الكليه ...لكن الشكل فهى بالظبط شبه كريستين دانست بطلة سلسلة افلام سبايدر مان حتى كانت مقلداها بالظبط ف لون شعرها ولبسها..قصدى طريقة لبسها ....انا والله كان هاين عليا اثبتها واقولها :على فين يا ماما هو انتى فاكره نفسك داخله نادى الجزيره مثلا .,....يا هشكه فى عالم هنا محرومين.....مسلمين نفسهم خالص ....يا حول الله يا رب منظر الاولاد عند البوابه وقتها كان يحزن بصراحه ...يعنى لما يبقوا شباب زى الورد كده وكلهم واقفين فاتحين بقهم كده ......البنات اللى من النوع ده بيفتنو البنات اكتر من الولاد ...لان البنات اكيد بتغير منهم ويقلدوهم ....الحقيقه موضوع الهشكات ده هو اللى والله خلاني افكنى من الشغل ف شرم اللى مكنتش حتى كملت فيها 6 ايام ....وهناك العمليه افظع بكتييييير ............الغريب ان الهشكات اللى من النوع ده ورقهم ومصالحهم بيخلص بسرعة وده طبعا لانهم بيستغلو امكاناتهم الفرديه احسن استغلال.

اه ...نرجع للبوابه ...انا مش هطول ف الكلام بس اكيد الناس فاكرة مشهد نيكول سابا ف فيلم التجربة الدينماركية لما كان عادل امام بيقول ...احنا مش اتوبيس يا كلاب ....هو ده اللى حصل بالظبط البوابه قامت عليها مظاهرة...والناس كلها فاتحه بقها وبرضه زى الفلم كان فيه واحد افريقي قاللى هديك 50بقرة وتجوزهالى ...طبعا الراجل بتاع الامن ماسألهاش لاعن الكارنيه ...لان واحده زى عمرها ماتكون معانا فى المجمع ...(هتعيش ازاى دى ف وسط الوحوش ؟؟؟) ..

البنات ف المجمع الى حد ما محترمين جدا .....هى اكيد جايه تحول ...او ممكن تكون ولية امر طالب فرفور نسى السندوتشات وهى جايه تفطره ....وتفطر اصحابه !!!؟؟؟....الراجل فضل فاتح بقه ...والمظاهره والهشكه عدو من البوابه ومفضلش الا انا والبنت المنقبة ......طبعا انا وسعتلها قدامى ...لآنى :)جنتل والله........واذا بالراجل ...بعد ما فاق من الصدمه ...يسألها عن الكارنيه ...طيب البتاع الابيض اللى هى شايلاه ...؟؟؟؟هيكون مثلا بدلةكاراتيه ؟؟؟...اكيد بالطو وهو داخله بيه الكليه........طبعا الغلبانه طلعت الكارنيه ...

بس عشان هى مش هشكه!

ملحوظه ....... الهشكه فى اللغه الدارجه يعنى بنت حلوة ...اوى شىء من هذا القبيل

برايز

je suis l'etoile real

الحقيقة الواحد احتار ..كل يوم نسمع اغاني وطنية ...ونشوف افلام جامدة طحن بتتكلم عن مشاكل الناس و الوطن والهجص ده كله...لكن مش معقولة يعني كل الناس اللى واكلينهاوالعة وطنيين بجد ....اومال الناس الاشرار اللى احنا بنسمع عنهم دول يبقو مين ؟؟؟؟؟ .....احنا مثلا ؟؟

لكن انا النهارده هتكلم عن اغنيتين وفيلم لفتو نظري اوى اوى اوى

ارمى حمولك عليا

هيثم شاكر ..البنى ادم الحساس الطعم النايتي بيغني لمصر وبيقولها ...ارمي حمولك عليا ...وانا اشيل عنك شويه .....تشيل ايه يا ابوهيثم ده انتا تعبان ملة و بتكح ف رضه...هيثم يا جماعة رفض اول طلب بلده تتطلبه منه ...مصر قالتله ...:يا بني يا هيثم ..احمى يا حبيبي ...يقوم هيثم يرد ..: يا ماما..انا بشيل بس

فكنا من هيثم دلوقت لاني اصلا بموت فيه ومش عايز اهاجمه

مصر اللى بتضمنا

طبعا الاغنية الوطنية الجامدة اللى كانت مكسرة الدنيا وكان فيها ناس كتيربيتغني ...وكان من ضمنهم تامر حسني.....الفرفور ....الفرفور بقه كان بيقول فى وسط الاغنية ....وعيون صاحية تخلى بالها من ارضها ....الله على الاحساس يا جماعة ....بس يا ترى ؟؟؟هل هو فعلا عنده استعداد انه يضحي عشان مصر....هو اصلا شاغل دماغه بمصر ولا بالناس اللى ف مصر...طبعا انا مش قصدى على مصر اللى هى المعادى ولا مدينة نصر ولا مصر الجديدة ...انا قصدى على الزاوية وشبرا وبولاق ...والعشوائيات .؟هى دى مصر الحقيقية

لا وف الاخريقولك نجم الجيل ...نجم الجيل بيقول انه بيحب البلد بس وقت التجنيد يقول معلش .....هو فى ايه ؟...ولا الناس التافهة اللى بيعيطو عليه ؟؟؟؟بقه احنا نشوف الغلط بعنينا ونقول عليه صح ....ده احنا نبقى ناس وحشه اوى ...طيب الناس اللى فى المعتقلات اللى اتحبسوا عشان كان نفسهم ان الانسان المصري يعيش بكرامة .....محدش عيط عليهم ليه ...؟؟؟..دول ملهمش الا ربنا

عمارة يعقوبيان

الفلم اللى كان مكسر الدنيا وموقفها على رجل انا كنت فى الفيلم فى السينما الناس كانت بتصفق تقريبا طول الفيلم....الفلم بيتكلم عن مشاكل الناس وعن مصر كمجتمع واللى المؤلف د.علاء الاسواني اختصرها فى العمارة وسكانها اللى بيمثلو مصر...لكن لو اتأملنا شويتين فى الفيلم هنلاقى ان اللى عملو الفيلم بيناقضو نفسهم تماما .....يعنى انا لفت نظرى حاجتين تلاته كده فى الفلم

@@محمدعادل امام @@

ابن عادل امام بيظهر فى الفلم فى دور ابن البواب (طه) اللى الدنيا ملطشه معاه ....الولد بأمانة عمل دور حياته ...لكن احنا لو بصينا على طه فى الفلم هنلاقيه بيتقدم لكلية الشرطه وبيترفض عشان الكوسة..... انا عارف ان الولد ممثل هايل ...لكن ده مش معناه انو مكنش فيه حد ينفع للدور الا هو..... طيب يعنى انتم فى الفلم بتتكلمو عن الكوسه....طيب ما هو عادل امام حشر ابنه فى الفلم بالكوسه ؟؟؟؟؟؟؟؟ ايه ده ...بيقولو حاجه وبيعملو حاجه تانيه

@@مروان حامد @@

الروايه اللى عملها د.علاء الاسواني خدها الكاتب والمفكر الجامد اوى وحيد حامد ويعنى عمل عليها شوية تعديلات ...انا مش فاكر كل التعديلات لانه كان عدى وقت بين ما قريت الكتاب الاصلى وبين ما اتفرجت على الفلم لكن على ما اعتقد انو فى الروايه الاصلية حاتم رشيد (اللى هو الراجل الشاذ )مكنش بيتقتل فى آخر الفلم ....عموما انا مش فاكر لكن الشىء اللى لفت نظري ان الكاتب وحيد حامد اللى على ما اعتقد عمل السيناريو ...وهو برضه شريك الانتاج وهو برضه اللى مش عاجباه الكوسه اللى بقت فى كل حته .....بنلاقيه بيحشر ابنه مروان ...مروان وحيد حامد بقى هومخرج الفيلم...الحقيقه الناس كلها اشادت بيه ...لكنانا بما انى مهتم بموضوع السينما والاخراج خصوصا ...مشوفتش صعوبه كبيرة فى الفيلم سوى فى اولى مشاهد الفلم والمشهد اللى طه بيموت فيه ....لكن على الرغم من ان الفلم طلع على مستوى عالي من الاخراج ...الا انى شايف ان ده مش مفاجاه ...لان المخرج معاه اجمدواكبر ممثلين فى البلد ...معاه مدير تصويركاميراته ملهاش حل ملهاش حل فعلا وموسيقى تصويرية لا بأس بها .....يعنى مفيش حجه للفشل

مستوى مروان حامد الحقيقي بان من خلال الكليب التعبان اللى عمله لعمرو دياب ...ايه القرف ده ...شوية بنات بترقص ...وجايب واحده واقفه مع عمرو دياب على البحر ...؟؟؟؟ الكليب ده مش من مستوى عمرو دياب ...الكليب ده يدوب ينفع يبقى اعلان لسمنة ام السعد ...وهيبقى برضه اعلان فاشل .....يعنى اللى يشوف الفيلم هيقول ان اللى يعمل فيلم زى ده اكيد مخرج موهوب لكن اللى يشوف الكليب هيقول عليه سمكري مبتدىء.....كله بسبب الكوسه

@@اسعاد يونس@@

اما بقى اسعاد يونس ...اللى بقت حوت فى مجال الانتاج والتوزيع ...( وانا مش ببالغ لما بقول حوت ) فهى جاية تمثل بفلوسها ...وجايبينها فى دور....يعنى سهل نسبيا لانه مفيهوش ريأكشنات كتيره .....ومن غير تعليق الناس كلها عارفه انها بتمثل بفلوسها

من الاخر رساله الفلم مختلفة تماما مع افعال الناس اللى صنعت الفلم...وده غلط كبير لان الفنان المفروض يبقى انسان حساس ويبقى كلامه زى افعاله ...لانه دايما بيبقى مثل اعلى لناس كتير

je suis l'etoile real

لكن اللى الواحد عايز يقوله ف الاخر انمفيش حد من النجوم اللى احنا بنصفق لهم يقدر بجد يعبر عن الناس لانه عمره ما عاش مشاكلهم بجد...وانا فى رايى ان النجم الحقيقي هو المواطن الى اتهبل فى عقله وقرر انه يقف على طابور الفرن عشان يجيب عيش ...هو المعتقل السياسي اللى مسجون ظلم....هو الجندى اللى واقف يحرس الحدود فى حين ان تامر الفرفور قاعد بيحب فى مى عز الدين ....هو الطالب اللى يقعد سنه ونص فى صيدلة طنطا من غير ما ينتحر

جتكو مصيبة فى اشكالكو

صباح الخير ...يوم جديد فى الكلية.... الناس ماشية الصبح مش شايفة حاجة خالص ...وزى كل يوم الواحد ماشي وعارف هيقابل مين وفين ...العيال دول واقفين يشتمو فى بعض...جنب البوابه ...والبنتين اللى هناك دول عمالين يجيبوا فى سيرة الناس ...اما الشلة اللى هناك دول فالواحد سايبهم من الاسبوع الى فات متلقحين تحت نفس العمود و فى ايديهم نفس السجاير اللى كانو بيشربوها الاسبوع اللى فات ...وحتى لو جيت بعد سنتين ....هلاقيهم متلقحين برضه ...صباحين وحته يا بو حسام ...نفس الكلمة قلتها الاسبوع اللى فات ...والواد اللى هناك ده بيسلم عليا وهو اصلا مش بيحبنى .... وكمان بيتكلم عليا من ورايا ...!!!!؟؟

الحمد لله ...الواحد يقدر يمشى فى الكلية مغمض ...ويسلم على الناس برضه ...لانهم نفس الناس وفى نفس الاماكن وبيتكلمو نفس الكلام

المهم دخلنا السكشن وكل حاجة قشطه وعادى ...طبعا احنا كنا 130 نفر مزنقين فى بعض ..السكشن كان قشطه يعني الواحد مكنش فاهم حاجه واهى العملية هاتعدى هنعمل التجربه احنا الخمسة (عندنا فى الكلية عشان المكان ضيق بناخد السكشن مرتين بس فى الاسبوع وكل 5 او 6 بشتغلو عملى مع بعض...وعدد السكشن 130 طالب ...يعنى مفيش حد بيعمل حاجه لوحده ...لكن ساعة الامتحان بيرموك تعمل كل حاجه لوحدك !!!! ده لو انتا من برا الكلية ....!!؟)

طبعا انا ما حطيتش ايدي فى الحاجه ..انا كنت لابس البالطو ومستني الدكتور ينادى الغياب ....!!؟

المعيد متضايق وعمال يزعق ..السكشن كله ولاد ومنظره يغم اى معيد ... وكان عايز يطرد ناس من السكشن....يا رب

يا رب عدي ام السكشن ده على خير ...يلا يا بنى اعملو اى حاجه عايزين ننجز على ما الغياب يتاخد

وجه الغياب

المعيد جاب الغياب ..والعيال اتلمت حواليه وبدأ ينادى ....كان باين عليه انو متضايق من حاجه...؟

انتا يا بني سيب اللى فى ايدك واسمع اسمك ....انتا يا بني رد بصوت عالى ....كان عمال يقول كده ...!!؟

العيال لازقين فى المعيد ...وهو متضايق ..انتا يا بني على صوتك وانتا بترد .....جتكو مصيبة فى اشكالكو....!!؟

؟؟؟كان بيبرطم لكن احنا كنا حوالى 30 نفر حواليه وسمعناه

انا ساعة ما نطق الكلمة دى بصيت فى الارض وعملت نفسي مش سامع ...وده اللى الباقي تقريبا عمله...عادى يا عم...حيوانات والناس بتشتمهم عادي ...نفسي انكسرت اوى ...كنت هاعيط والله

خدت غيابي ونزلت وقعدت افتكر فى المنظر...افتكرت الاضاءة ..ريحة المعمل الى خنقت جوايا البراءة...صوابع ايده وهى بتفتح كشف الغياب للنور... للحياة...... عشان ياخد غياب عيل كان هيطرده...ياه على الاهانه ....!!؟

صوته عمال يرن فى وداني جتكو مصيبة فى اشكالكو ...فى اشكالكو....... فى اشكالكـــــــــــــــــــــــــــــووووووو....؟

قلت فى عقل بالي انا لو كان ابويا دكتور جوا الكلية ولا حاجه كنت خدت حقى ...والله كنت شرحته ومحدش كان هيكلمنى ..وانا مش عويل فيه ...لكن هنقول ايه ...؟؟؟

انا كنت فى يوم فى الدور السادس ....انهبلت فى عقلي واتزنقت ...حاولت اخش الحمام....... لقيته زى ما انتو شايفين كده فوق

صوت المعيد فى ودانى ...وصورة الحمام فى عنيا ....خيالى بدأ يسرح فى حاجات تانيه ...احنا ايه اللى بيتعمل فينا ده...وعلى ايه ده كله ..!!!!!؟؟؟؟؟؟

وانا نازل على السلم كنت باصص ف الارض وكنت هاخبط فى بنوته زى القمر ....قمر ...والله هى خلتنى اطلع من المود اللى انا فيه ...ربنا يباركلها يا رب...!!؟

فوقت من اللى انا فيه وبدأت ابص قدامى...لقيت لوحه مكتوب عليها .......ان رسالة كلية صيدلة طنطا هى الارتقاء والتميز ...الخ

ضحكت ضحكة خبيثه كده ورفعت ايدى للسما وقولت

حسبي الله ونعم الوكيل.....!!!!؟